अवैध अग्निशस्त्र बाळगणारे दोघे पोलिसांच्या ताब्यात गावठी पिस्तूल, जिवंत काडतूस, मोबाईल व दुचाकी असा १ लाख ४० हजारांचा मुद्देमाल जप्त

अवैध अग्निशस्त्र बाळगणारे दोघे पोलिसांच्या ताब्यात
गावठी पिस्तूल, जिवंत काडतूस, मोबाईल व दुचाकी असा १ लाख ४० हजारांचा मुद्देमाल जप्त
कराड: ग्राम दौलत न्युज नेटवर्क-
कराड उपविभागीय पोलिसांच्या पथकाने निवडणुकांच्या पार्श्वभूमीवर अवैध अग्निशस्त्र बाळगणाऱ्या दोन तरुणांविरुद्ध कारवाई केली. यामध्ये गावठी पिस्तूल, जिवंत काडतूस, मोबाईल व दुचाकी असा एकूण १ लाख ४० हजार रुपयांचा मुद्देमाल जप्त केला आहे.
अल्तमश ऊर्फ मोन्या हारुण तांबोळी (वय २५) रा. पालकरवाडा मंगळवारपेठ, कराड व ओमकार दीपक जाधव (वय २२) रा. होली फॅमिली स्कूलजवळ, विद्यानगर, सैदापूर अशी पोलिसांनी ताब्यात घेतलेल्यांची नावे आहेत.
याबाबत पोलिसांकडून मिळालेली माहिती अशी की, पोलीस अधीक्षक तुषार दोशी व अपर पोलीस अधीक्षक डॉ. वैशाली कडुकर यांनी कराड व मलकापूर नगरपालिका निवडणुकीच्या पार्श्वभूमीवर जिल्ह्यातील कायदा व सुव्यवस्था अबाधित राखण्यासाठी अवैध व्यवहार व अग्निशस्त्र धारकांविरोधात विशेष मोहिम राबविण्याचे आदेश दिले होते.
या आदेशानुसार, उपविभागीय पोलीस अधिकारी राजश्री पाटील यांना शुक्रवार, दि. ७ नोव्हेंबर संध्याकाळी खात्रीशीर माहिती मिळाली की, दोन इसम सैदापूर/विद्यानगर कॅनॉल परिसरात अवैधरीत्या बिगर परवाना अग्निशस्त्र बाळगून फिरत आहेत. त्यानुसार त्यांच्या मार्गदर्शनाखाली पथकाने सापळा रचून अल्तमश ऊर्फ मोन्या हारुण तांबोळी व ओमकार दीपक जाधव या संशयितांना ताब्यात घेतले.
या कारवाईत त्यांच्याकडून ५० हजार रुपये किंमतीचे गावठी बनावटीचे अग्निशस्त्र, ६०० रुपयांचे जिवंत काडतूस, १५ हजार रुपयांचा मोबाईल फोन, तसेच ७५ हजार रुपयांची दुचाकी असा एकूण १ लाख ४० हजार ६०० रुपयांचा मुद्देमाल जप्त करण्यात आला. दोघांविरुद्ध कराड शहर पोलीस ठाण्यात गुन्हा दाखल करण्यात आला असून, पोलीस करत आहेत.
ही कारवाई उपविभागीय पोलीस अधिकारी राजश्री पाटील यांच्या मार्गदर्शनाखाली सहाय्यक पोलीस निरीक्षक अमित बाबर, तसेच पोलीस अंमलदार प्रविण पवार, सागर बर्गे, प्रशांत चव्हाण व मयूर देशमुख यांनी केली. पोलीस अधीक्षक तुषार दोशी आणि अपर पोलीस अधीक्षक डॉ. वैशाली कडुकर यांनी या पथकाचे कौतुक करून अभिनंदन केले आहे.